ოზემპიკი – წონის კლების სწრაფი საშუალება თუ ჯანმრთელობის სერიოზული საფრთხე

ჯანდაცვის მოფლიო ორგანიზაციის განმარტებით, სიმსუქნე ქრონიკული დაავადებაა, რომელიც ორგანიზმში ცხიმის გადაჭარბებულ რაოდენობას ნიშნავს და საფრთხეს უქმნის ჯანმრთელობას; სიმსუქნის კლასიფიკაცია სხეულის მასის ინდექსის გამოთვლით დგინდება. თუ სიმაღლისა და წონის ფარდობისას მიღებული რიცხვი 30-ს აჭარბებს, დგება პირველი ხარისხის სიმსუქნე.

ჯანდაცვის მსოფლიო ორგანიზაციის ცნობით, საქათველო სიმსუქნის მაღალი გავრცელების მაჩვენებლის მქონე ქვეყნებს შორისაა. კერძოდ, 10 ზრდასრული ადამიანიდან 6-ზე მეტი ჭარბწონიანია, მათ შორის 3 მსუქანი. პრობლემურია ბავშვთა ჭარბწონიანობის საკითხიც. საქართველოში 7-9 წლის მოსწავლეების 27% ჭარბწონიანია, აქედან 11% მსუქანი. 

სიმსუქის წინააღმდეგ ბრძოლა რთული, კომპლექსური საკითხია. ზოგი კალორიებს ითვლის,ზოგი სპორტდარბაზში გატარებულ საათებს. სხვები  წონის დასაკლებ ფერად-ფერად ,,კოქტეილებს’’ სვამენ ან მკაცრი დიეტითა და საყვარელი საჭმლის აკრძალვით ცდილობენ ფორმაში ჩადგომას. ეს პროცესი ხშირად გაცილებით მეტია,  ვიდრე მხოლოდ ფიზიკური შრომა — მას თან ახლავს ძლიერი ფსიქოლოგიური დაძაბულობა, თვითშეფასების კრიზისი თუ სოციალური ზეწოლა. პრობლემას სიმძაფრეს ჰმატებს თანამედროვე ტენდენციები, არარეალური სტანდარტები თუ სოციალური ქსელებიდან მომზირალი იდეალური სხეულები.

პროკრუსტეს სარეცელი დღესაც არსებობს. ერთი ფორმისა და ზომის ადამინებს რკინის საწოლის მაგივრად, ინსტაგრამის ფილტრები, ფოტოშოპი თუ სხვა თანამედროვე აპლიკაციები ქმნის. იდეალური ფორმების მიღწევა განსაკუთრებით სასურველია მაშინ, თუ პრობლემას ერთი პრეპარატი, ოფლის დაუღვრელად გადაჭრის. ბოლო წლებში ასეთი აქტუალურობა ანტიდიაბეტურმა პრეპრატ ,,ოზემპიკმა’’ შეიძინა. მედიკამენტის პოპულარობამ მსოფლიო მოიცვა. 2024 წელს ილონ მასკმა საკუთარ პლატფორმაზე სანტას ფორმაში გამოწყობილი ფოტოც გამოაქვეყნა, წარწერით – ,,ოზემპიკის სანტა’’. ,,იქსის’’ მფლობელი დაკლებულ კილოგრამებს მედიკამენტს უმადლის.

საქართველოში პრეპარატის ,,ბუმი’’ 2023 წელს დაიწყო, როცა ადამიანებმა სამედიცინო დანიშნულებისა და საჭიროების გარეშე, თვითნებურად დაიწყეს ინექციის გაკეთება.ხელოვნურად  შექმნეს ,,ოზემპიკის’’ დეფიციტი იმ ადამიანებისთვის, რომლებსაც ნამდვილად ესაჭიროებათ ანტიდიაბეტური საშუალება. 

რა არის ოზემპიკი და რა კავშირი აქვს მას წონის კლებასთან?

სემაგლუტიდი (სავაჭრო სახელწოდება – ოზემპიკი) არის  მეორე ტიპის დიაბეტის სამკურნალო საინექციო მედიკამენტი,რომელიც ფიზიკურ აქტივობასა და კვების სწორ რეჟიმთან ერთად სისხლში შაქრის დონეს არეგულირებს.  სემაგლუტიდის განსაზღვრული დოზის მიღებისას ითრგუნება მადა და აღინიშნება დამატებითი ეფექტი წონის კლების კუთხით. სემაგლუტიდი თავის ტვინსა და ნაწლავებში არსებულ მადის ცენტრებზე მოქმედებს და დანაყრების შეგრძნებას აძლიერებს. ის ასევე ,  მოქმედებს კუჭქვეშა ჯირკვალზე, ხელს უწყობს ინსულინის ნორმალურ გამომუშავებას. ოზემპიკის მიღებას ისეთი გვერდითი მოვლენები ახასიათებს, როგორებიცაა :

•       გულისრევა
•       ღებინება
•       ფაღარათი და შეკრულობა.
•       სხვადასხვა ინტენსივობის მუცლისა და თავის ტკივილი.

ენდოკრინოლოგ სალომე ჟვანიას განმარტებით, ოზემპიკის მიღების დროს, შესაძლებელია განვითარდეს  პანკრეატიტი, რომელსაც სერიოზული გართულებები მოჰყვება, მათ შორის – პოსტპანკრეატიტული შაქრიანი დიაბეტი.  ნაღვლის ბუშტის გაღიზიანება, განსაკუთრებით – კენჭოვანი დაავადების მქონე პაციენტებთან, თირკმლის მწვავე უკმარისობა და მწვავე ალერგიული რეაქცია. ,,სემაგლუტიდის ცხოველებზე ცდების ჩატრებისას  ფარისებრი ჯირკვლის ავთვისებიანი სიმსივნე გამოიწვია, ამიტომ არამარტო ოზემპიკის, არამედ არანაირი მედიკამენტის გამოყენება თვითნებურად არ არის რეკომენდებული და მსგავსი ქმედება ჯანმრთელობასა  და ხშირად პაციენტების სიცოცხლესაც სერიოზულ საფრთხეს  უქმნის.’’, – განმარტავს ენდოკრინოლოგი.